Come un camel so bever mi, co ciama,
però 'nca mi, metendome de impegno,
me pol suceder de passar el segno
dimenticando de tirar el slaif.

Cussì presempio me xe nato ieri
che in taverneta stavo, in via del Toro,
e che go perso dignità e decoro
colpo de un dopio maladeto in più.

'Sto qua xe stà: che mi a un zerto momento,
ulmo che iero come una coriera,
go tracanà altra morca e, bonassera!,
sora dei oci ga calà el rolè.

E via mi, in tera, longo distirado,
cascado "come corpo morto cade",
che no me alzavo gnanca a ciorme a piade
o a pironade, calcolo, int'el cul.

Un'ora e meza, i me ga dito dopo,
go spavà in tera, palido, mi, fredo,
come un de quei "te vedo e no te vedo",
ma per fortuna po me go sveià.

E co me sveio me li vedo 'torno,
tuta la banda, preocupadi, ansiosi,
che però za i voleva, stomigosi,
dirme el rosario e chi ga 'vù ga 'vù.

"Come xe Toio? Cossa te xe nato?"
Gigi xe el primo, in caso de bisogno.
"Che ora xe?" mi "E indove son? Che sogno...
muli, che sogno che me go insognà..."

"Conta, su, conta" tuti che me pressa.
"Sì" fazo mi "ma strambo... figureve
che mi me alzavo, e no me iera greve,
siben che un fià rolassi per el vin..."

"E po?" "E po gnente, po me incaminavo
per una sorta, mi, de galeria,
senza una frasca, senza un'osteria,
ma longa, longa che no ve so dir.

E po ala fine de 'sta galeria
iera una fonte, come, luminosa,
e go sentì una vose misteriosa
che me ciamava 'Alo Toio, vien...'"

"Orpo!" fa lori. "E in fondo de 'sto tunel"
mi "go trovado mio papà, con nona,
e 'rente a lori quela santa dona
che iera mama, e i me spetava a mi..."

"E te son 'ndà?" "'Ndà dove? Ma scherzemo?
Che mio papà, co apena me ga visto,
el me ga dito, franco, de esser cisto
come che in vita mai no'l iera stà.

'Sa Toio' questo el ga savudo dirme
'sicuro ti te me darà un aiuto,
che qua xe bel, però vin e parsuto
nissun regala, e za nudo int'el puf...'"

Come che ga de esser in 'sto mondo
che zerte idee, mi calcolo, le nassi
squasi per caso e, se te le studiassi,
no te 'rivassi meio de cussì.

Ga capità, me spiego, un dopopranzo
che iero in pien lavor in taverneta
e navigavo in piomba zircospeta
per via ch'el ciodo gaveria piantà.

Fin che son là che stroligo el de farse,
tuto de colpo me se impana i oci
e no me guanta più gnanca i zenoci
e vado insieme come un tululù.

'L osto, cagà che no ghe tiro i crachi,
cossa sa lu se infarto o mal de panza?,
in do e do quatro el ciama l'ambulanza
che vien, me ingruma, e via mi in ospidal!

Solo che mi, 'rivà in pronto socorso,
me iera za passade le scalmane
e go tacado a rider come un nane
pensando al conto che no go placià.

"Ci beva meno!" me ga dito i mati,
ma dopo mi go ripensà de sora
e me son dito: "E se fazessi ancora?
Trovà la strada, basta no frenar!"

Difati mi, dopo de quela volta,
me son passà osteria per osteria,
e in ogniduna per mandarme via
la crocerossa i ga dovù ciamar.

Fina impiombarme andavo per el carso
e int'ogni posto, prima che no i seri,
'ndavo in puina e i soliti infermieri
coreva là e i me omologava el puf.

Fin che una sera in via Mulin a Vento,
dopo una s'cinca de valpolicela,
mi go zucà un fià tropo la cordela
e là me stava per andar 'ssi mal.

Cussì xe stà: co iero ben che ulmo
go fato, mi, la mia grandiosa ssiena,
me go butado zo per tera in schena,
go serà i oci e chi ga 'vù ga 'vù.

Preciso uguale a tuti i altri osti,
là, sul momento, 'l osto se impressiona:
"Ciamè un dotor, su, 'vanti che 'sto mona
me vadi in rigor come un bacalà!"

'Riva i infermieri in pressa, sempre lori,
e uno fa: "Fermi! 'L omo non si toca!
Stavolta provo a farci il boca a boca
e lu sicuro ci rinvenirà!"

Come che sento un tanto me alzo suso
perchè son ulmo, sì, ma no imbriago,
e zigo forte: "Prego, quanto pago?
Volessi el conto, sa come che xe...!"

In 'sta vita el pedocio xe malvisto,
spezialmente co xe zerte ocasioni,
e co ocori de far i grandezoni
guai al mondo tirar el cul indrè.

E cussì, co i me ga invitado a noze,
cisto su cisto zo, mi go pensado
che gavessi dovù 'ndar ben tapado,
chè, no so se gavè mai osservà,

ma co xe un sposalizio, inte 'l rinfresco,
chi che xe mal conzà nissun lo caga,
e se 'l vol un bicer el se lo paga,
mentre invece, se un xe ben vistì

i ghe dà la propusniza pulito
de servirse in bufet liberamente,
e se uno xe gato come gnente
fina casa el se porta de magnar.

Bon, per dirve che son andà de un sarto
a ordinarme un vistito su misura,
che, un fià taio de stofa, un fià fatura,
e un fià fodre, go fato veli puf!

De matina ale oto el me ga ciolto
le misure, 'sto sarto: vita, spale,
po caval dele braghe, naturale,
e che torno ogi oto per provar.

E mi dopo oto giorni, verso sera,
son tornado difati per la prova,
e me provo el vistito, e, sa che nova?,
tuto quanto el me strenzi e fina, ciò,

no xe santi che 'rivo imbotonarme.
"Go falà le misure!" el fa, stupìdo
"Ma stanote lo slargo e garantido
per diman de matina el xe imbastì!"

Cussì torno, mi, al indoman matina,
e me provo, e lo vardo po de bruto
a 'sto sarto, perchè me bala tuto
come a un clonzo che vegni de patòc.

"Bon, va ben" me fa 'l omo "strenzaremo,
la me torni stassera per le oto,
che, se 'rivo 'bastanza a darghe soto,
per stassera magari go finì."

Mi ale oto, puntual, son in botega
a provar 'sto vistito e, vai malora!,
me xe strento de novo, e 'l mato 'lora
come un saltamacaco el salta su:

"No capisso più un curaz, varremengo!
El xe largo, el xe strento, qua per vero
'sta putana de stofa xe un mistero,
o son mi che no so più lavorar!"

"No" ghe fazo mi, calmo "più che altro
xe che mi imbarco vin come una bote
tuto el giorno e me sgionfo, ma de note
gaverò, ciò, el dirito de pissar?"

'L omo, sincero, el va magari drito,
ma co'l xe ulmo lu'l va a mezanave,
el fa monade e po diventa grave
chè no'l xe bon più de tirar el slaif.

Ciolemo un omo come Gigi Piria:
toco de pan, no ocori che ve digo,
però 'nca lu co'l bevi xe caligo
e no'l ga più nissuna inibizion.

Come presempio quela sera tardi
che, rodolando via del'osteria,
el 'veva fato la castroneria
de intardigarse un fià per la zità.

Difati, 'ndando verso de marina
per controlar se iera alta marea,
ghe 'veva a lu lampà in glava l'idea
de scalar, ciò, el palazo dela Ras.

Ve lo vedè? Op, su come un fureto,
a rampigarse franco per el muro
come che fussi el Velebit, e duro
tignirse in modo de no cascar zo.

Po ga dovudo intervignir la pulia
cole sirene e fin coi lampegianti,
e po i pompieri anca, a zigar ch'el guanti
fina che iera distirà el telon.

Bon, imbragà, portado in Coroneo,
el giorno drio po subito processo,
'ndove che, colpo un avocato cesso,
i ghe ga dà sie mesi de preson.

E senza gnanca la condizionale
per via ch'el iera, come, rezidivo,
oltra che duro, e 'l giudice, cativo,
ghe ga petà la seminfemità.

Che po sie mesi xe 'bastanza longhi
in buso, e là no xe che un se remena:
un suguman bagnà zo per la schena
ogni matina, e piade inte 'l daur.

Bon, no fa gnente, ga passà anca i mesi
e, co i doveva a lu molarlo fora,
son là davanti, mi, za de bonora
per compagnarlo a bever un bicer.

Ma el tempo cori e Gigi no se vedi,
'lora mi vado a baterghe la porta,
però un pulioto cola luna storta
prima el me 'scolta e po 'l me fa che no:

"Che il detenuto Piria ci risulta
poteva ussir, per noi, con pronto efeto,
ma è tratenuto drento inte 'l spaceto
del quinto ragio, fin ch'el paga el puf!"

"Porca putiza!" go pensà "Ma vara,
un come Gigi, colpo de esser boba,
ris'cia ciapar 'l ergastolo, e chi roba
i manda casa come fussi drek!"

So, xe intrigoso 'ver la casa neta,
ma de nudar nel drek no me la sento,
cussì ogni tanto mi ghe dago drento:
oio de comio, Cif e Amoniacàl.

Neto per neto propio se volemo
no xe 'ssai volte, chè son sempre duro,
e co son duro, logico, sicuro
no go frescheza de star là netar.

Ma bestie no! 'Ver bestie mi no ameto,
perchè le bestie porta malatie
e no podessi 'ndar per le osterie
se i me serassi a mi int'un ospidal.

Podè capirme, 'lora, se ve conto
de quela volta quanto xe stà grave
che in piena note go sentì le trave,
quele per tera, farme cric e croc.

"Orca tu' pele!" go pensado "Un sorzo!
'Sto qua xe un sorzo in casa che camina!
Speta ti, mona, che diman matina
farò mi in modo che te ciapi el chez!"

Cussì xe stado, e 'l indomani presto
me go impensà de 'ndarme cior un gato,
grosso, cativo, quei che gnanca un mato
se permetessi star ciò mi ciò ti.

Lo go menado ben pulito suso
e ghe go dà la pianta dela casa,
po ghe go dito: "Và, e tabula rasa
fame del sorzo, e chi ga 'vù ga 'vù!"

Per tuto el giorno po no lo go visto,
solo de sera, povero, in stampele,
che ghe fazeva mal le bartuele
'vendo i mustaci sule ventitrè!

Bon, raus el gato! E 'lora go impiantado
una grandiosa trapola per sorzi
col grana in mezo: "'Pena el se inacorzi"
go calcolado "el sorzo xe kaput!"

Invece gnente: co son 'ndado a veder
no iera gnanca odor più de formaio,
però al suo posto, e là go magnà aio,
iera, invitante, un quarto de merlot!

Stanco, abatudo, go ciapà una piomba
e maledindo in zito quel preclieto
me go cavà le calze e son 'ndà in leto
senza imbustarme gnanca int'el linziol!

Co ga passà i efeti dela s'cinca
me go sveià, per vèder sula porta
un sorzaz griso, cola luna storta
e sora el muso maschera antigas.

"Lavarse, omo!" el me ga fato moto,
po'l ga spudà per tera e 'l xe 'ndà via.
Savè, pei pie, sicome go alergia,
no 'dopro mai ne Cif nè Amoniacàl!

Duri va ben come scalini, o anca
incanfarai de 'ndar soto la tola,
ma co se vedi in ziel un mus che svola
là xe la volta de tirar el slaif.

Ieri de sera mi me ga tocado
presempio, no, no digo propiamente
de veder mussi in ziel, ma come gnente
squasi vedevo se vardavo ben.

Dio, iero lustro, quel no se discuti,
come passà col mocio e cola ziera,
anca per quel tornavo in colombera
'vanti che 'ncora i pensi de serar.

Gavè presente l'osteria de Gnanfo,
quela che 'pena fora dela porta
xe quela pianta imensa, anca se storta,
un ipo, credo, castano? Ben bon,

come che vado, ve disevo, fora,
cola nagana e 'vendo i oci in crose,
sento del alto che i me dà una vose:
"Ciò, cossa, mona, te me tiri zo?"

Vardo per aria, se capissi, e vedo
sora de un ramo, tuto cufolado,
un ipocampo mezo incagoiado,
verde butilia, che me cuca a mi.

"Ciò" tra mi e mi me digo "un ipocampo!
Come pol esser? So che i ipocampi
vivi int'el mar! O ben che qua go i crampi
sui oci, opur son fora de zervel!"

Po vardo meio, ma no go più dubi:
xe un ipocampo cole controbale,
anca se stimo che no sia normale
che un ipocampo fazi el pagnerol!

Fina che penso se butarghe piere
o ciamar l'Enpa, 'sto pessaz me prega,
ma in fin dei fati, stimo, el se ne frega,
perchè po el peta el sesto del ombrel.

'Lora mi torno drento in osteria
e coro là del osto 'rente al banco,
ciamo un otavo, po ghe conto franco
coss'che go visto fora del local:

"Un ipocampo, ciò, sora de un ramo
go intivà, credi, roba de no creder!
No te me credi? Va, va fora a veder,
te vedarà se go ragion o no!"

Me varda, Gnanfo, po'l fa spudaciando:
"Come no credo! El iera fin qua drento,
sa, coss'te credi, lughero e contento,
e 'l ga ciamado un triplo de merlot!

Solo che po, co iera de pagarlo,
no'l 'veva i bori, e ghe go dà una piada
ch'el xe 'ndà suso, calcolo, in cabrada!
E cossa, a un pesse go de farghe puf?"

Xe stada colpa dela sera prima
che iero in bori e 'vevo mi ciapado
velìka piomba del otavo grado,
quele che scassa fina su al zervel.

Eco perchè la sera dopo, essendo
in mala bala, un fià de assestamento,
mi no me 'ndava de serarme drento
e son 'ndà 'torno solo per zità.

Xe che per poco che te imbarchi in stiva
de qualche parte pur devi 'ndar fora,
cussì xe stà che tempo meza ora
za me ciamava mi de far pissin.

"Bon" go pensado "qua me par el caso
de sodisfar almeno 'sta impelenza!"
e go zercado un logo de decenza
de quei, contadi, publichi che xe.

Po me ricordo indove che xe uno
e fazo vela verso de quel posto,
no xe vizin, ma meio che pitosto
farsela in braghe o contro un cantonal.

Ma come son, ciò, in fronte al vespasiano
vedo un sie sete mati stralunadi
che i se conzerta e i par impressionadi,
per cossa, po, 'sta roba no se sa.

Po sento come un digriniar de denti,
tuto un latrar che vien fora del cesso:
savè de chi no 'riva farla spesso
e co la fa ghe stenta de vignir?

Un baio, un zigo, un ulular tremendo,
po un strepitìo, po un ringhio de cagarse,
come de un can che stassi per butarse
e morsigar el primo cul che xe.

Nissun se fida, ciò, de 'ndar a veder,
perchè ''sto qua xe un can rabioso' i disi,
e in fondo a chi no ghe secassi i bisi
de un can rabioso farse rosigar?

Solo che mi, ridendo, me impetisso,
e con coragio po me fazo 'vanti:
"Movite Gigi, che qua semo in tanti,
sa, che ghe scampa, miga solo ti!"

Difati ben che tempo do minuti
sbuca del cesso Gigi, vergognoso,
che se imbotona tuto sussiegoso
e po rutando el pompa via de là.

"Orpo" fa i mati "come te ga fato
a intivar ti che iera un imbriago?"
e go zercado, mi, de star sul vago
ma po ala fine me go palesà:

"Gnente, xe solo che con Gigi Piria
me go trovà za, lustri, in gabineto,
e lu co'l pissa el canta el Rigoleto
sempre, siben ch'el sa d'esser stonà!"

Mi go vissudo tuta la mia vita
nel equilibrio del voio no posso,
sempre sperando, mi, nel colpo grosso
che un fià le corbe m'avarìa indrizà.

Però se sa che chi vivi sperando
mori cantando, o pezo, mondo folpo!,
e più de un giro el mori per un colpo
che te lo lassa seco e impufetà.

Perciò, mi digo, ocori un fià iutarse,
e quela volta ben me go iutado
con un'idea che solo a un fulminado
come son mi ghe gavaria lampà.

Me go tapà tuta la note in casa,
in canotiera, mi, per star più fresco,
e un dizionario intiero de tedesco
'vanti de l'alba mi me go studià.

Po me go fato scorta de refosco
e go guantado carta e pena biro,
che tuto el giorno po, come un crumiro,
go scrito mi un longhissimo papir.

Co go finido, in piomba vagneriana,
go ben rileto, fandome anca el mazo,
po go petà una firma col svolazo:
Adolfo Chitler, gnoco e canzelier.

Col mio papiro strento soto scaio
el giorno 'vanti go ciapado el treno,
e son 'nedà gnente, mi, popodemeno
'ndove che so che i stampa Grando Otel.

"Qua" ghe go dito "go i diari segreti
del malegnaso Furer dei nazisti:
originali, in garanzia, e mai visti,
e li sbagazo, ma per 'ssai patus!"

Che bon, che forsi, me ga dito i mati,
che ghe li lasso almeno un per de giorni:
"Per controlar, capissie, poi ci torni
che casomai sarà di contratar."

"Bon!" mi go dito, e po, co son tornado,
mi me 'spetavo, ciò, che i me acoliessi
con el tapedo rosso, genuflessi,
e un capelaz de bori in sorapiù.

Invece gnente, i me tigniva el muso
e i me ga dito: "Questo ci è un bidone!
Cossa ci crede, lei, che siamo mone
tuti noialtri qua di Grando Otel?

Chitler sicuro mai no ci ha pensato,
come sta scrito sora questo folio,
di organizare l'anession del Colio,
e tanto meno usando la Vermàc!"

E a pintelcul fora i me ga butado,
ma mi me rompo, ciò, ma no me piego:
chi tontonava sempre 'Me ne frego!'?
No me ricordo, Mussolini o 'l Re?

Ierimo sempre i soliti baraba
che se pompava morca in osteria
ieri de sera, e de filosofia
si quistionava, e un fià de religion.

Solo che verso mezanote e meza,
che po xe l'ora che va casa el cisto
ma el petesson se esalta, sora el Cristo
'vemo tacado, come, a sbarufar.

"Perchè Gesù" afermava Gigi Piria
tuto ingalado "mi son strassicuro
che in vita sua no'l xe mai stado duro
e ch'el gaveva in sprezo 'l imbriagon..."

"No giureria" mi, franco, go obietado
"son del aviso, invece, con rispeto,
che, se i ghe ofriva un bulo caliceto,
no iera omo de formalità."

"Dio, un caliceto" fa Bobo Tre Panze
"mi stimeria che aceta tuti quanti,
po Lu, del tempio, el ga cazà i mercanti,
miga li ga cazadi del local!"

Zinzola Ciano, un fià, po'l ciapa parte
con mi: "Del resto, se volemo, a noze
el ga cambià aqua in vin inte le boze,
miga el contrario, me risulta a mi!"

"Sì" zonto "e in più, volendo esser sinceri,
co'l ga voludo far la caminada
sul pel del'aqua, calcolo, xe stada
dimostrazion che aqua no xe ben,

forsi int'el vin el gavaria nudado..."
"Cossa ghe entra?" Icio se intrometi
"No ocori miga bever caliceti
per bordisar a pie fina Grignan!"

E Gigi, duro, insisti: "Bravo Icio!
Po, torno dir, Gesù, Lu no beveva,
el iera astemio, e gnanca no'l saveva
coss'che vol dir un dopio de merlot.

Anca perchè, co'l iera in spiagia a Grado,
o chissa dove, 'desso no savessi,
moltiplicà Lu ga le bighe e i pessi,
nissun Vangelo ga parlà de vin..."

"E po" rincara Pepi Senza Fondo
per dirghe a uno 'alzite e camina'
ghe vol distanti star dela cantina,
che come gnente va i riflessi in drek!"

"Forsi xe vero" qua ghe dago ato
"però nissun me tira via de glava
che in fondo in fondo Lu'l miracolava,
sì, ma però no sempre fur per fur...

Perchè de dirne 'alzite e camina'
a un de noi co'l xe pulito in piomba,
no con un sesto, gnanca co'na bomba,
no'l gavaria podudo. Gnanca Lu!"

Dovè saver che Caio Cartafina,
toco de pan soto qualunque aspeto,
zercando el pel nel ovo el ga un difeto,
overossia ch'el xe un cicìn sposà.

Gnente sarìa se fussi brava molie,
ma xe una striga, ela, una babaza
che co lo vedi duro la lo taza
e la ghe fina dà col ratapalz.

Anca per quel, mi calcolo, el xe schila,
ch'el devi sempre corer per scamparghe,
e no'l pol gnanca quela de flociarghe
perchè 'sto folpo vol nasar el fià.

Bon, no fa gnente, te lo intivo un giro
in taverneta, lustro ma contento,
che el ridi solo e intanto el ghe dà drento
butando in stiva quarti de merlot.

"Viva là Caio!" stuzigo "E la molie?"
Me cuca, 'l omo, po'l scassa le spale
lu, disprezante, come chi ga bale
de fero, e gnente ghe pol far pipìu.

"La molie?" el fa, schizandome de ocio
"Te vedi questo?" po, e 'l me mostra el pugno.
"E cossa, biava te vol darme?" rugno,
ma lu "Che biava! In pugno ormai la go!"

"In pugno?" "In pugno!" "In pugno come in pugno?"
"In pugno, sì! E la me 'ndarà de viola
de qua in avanti, che la molie a scola
la go mandada ogi, altro che no!"

"Orpo!" ghe fazo mi "Che nova questa?
Che scola, ciò, per cani pulizioto?"
El ridi, lu, ma po 'l me fa de moto
che stago zito: "Xe una scola, sa,

apena 'verta, indove che a le molie
come le ga de esser i ghe impara,
de un gendarmo i te fa una perla rara,
zita, ubidiente, cucia, e in sorapiù

che no ghe tiri longhi, ela, quando
che un omo stima de ciapar la bala,
anzi, un suriso, un baso, e, ala ala!,
lavarghe i pie col amido in cadin!"

"Orpo che bulo" mi "se fussi vero..."
Po sluco un quarto e me calumo via,
ma lo ritrovo, a Caio, in osteria
de là un tre mesi, sconto int'un canton.

Povero, mufo el xe, ulmo de fasse
e inzerotado fina sui zenoci,
che anzi mi "Caio, ciò, beati i oci!
Coss'te son 'ndà, finir soto de un tram?"

"Ah tram, sì! Sa" el fa lu "quela famosa
scola? La molie mi la go mandada,
ma 'sta putana i me la ga bolada!
Ogni materia la ga 'vù picon!"

"Te vedi Gigi" ghe disevo a Gigi
filosofando un giorno in taverneta
"la via xe larga ma la foia streta,
e inte la vita tuto xe un destin!"

"Orca mastela!" sufia Gigi Piria
"'Sto qua me par che sia un parlar pulito!
Ti te vol dir che tuto xe za scrito?
Fin che noialtri qua faremo puf?"

"Vara presempio" vado 'vanti "nona,
povera nona mia, te ga presente?
De mulo sempre la gavevo arente,
più che mia mama, 'ssai più che papà!

No la voleva vederme imbriago,
e co no iero la me dava un premio..."
"Cossa, de picio ti te ieri astemio?
No posso creder!" Gigi xe stupì.

"Lassa che conto. Nona, te disevo,
la me imparava solo bele robe,
e guai a Dio se 'torno cole bobe
la me becava 'ndar a torziolon.

Fin la pianzeva, sa come xe i veci,
se i ghe contava che per le osterie
i me 'veva intivà con companìe
che, ghe pareva, fussi muli strauss.

Secondo ela gavaria dovudo
cul e camisa star con quel Luciano
fio de un barbier e de una de Ancarano,
che iera un lole che fazeva scaut.

Po ghe piaseva un zerto Robertino
con 'rece a vela e muso de fureto,
picio, educà, che fava el chiricheto,
e no podevo mi gnanca sofrir."

Gigi ghe pensa po'l me fa:" Ma alora
te frequentavi tipi cussì strani?"
"Altro che no!" rispondo "Per 'ssai ani
quei do pisdruli mi me go zumbà!

Per via che nona sempre tontonava
che le amicissie forma una cratura
e i boni amici po xe quei che dura
e drite giuste lori i te pol dar."

"Ah, la pensava forsi che magari,
'vendo ti 'vudo in fianco un bon esempio,
no te fazevi più che tanto el sempio
e no te 'ndavi 'torno a petessar.

Ma dime dime" Gigi xe curioso
"ma 'sto Luciano che te me contavi,
'sto Robertino che te bazilavi,
cossa, i xe morti? 'Ndove i xe finì?"

"Cossa finidi!" mi ghe salto suso
"Varili là: Bobo Tre Panze al banco,
e Ciano Stifel, quel che in Punto Franco,
duro de pivo, el ga varà un vagon!"

che fin al Enpa, so, 'l iera notado,
siben ch'el fussi tanto nominado
per esser omo solo interessà.

Fatostassì che a un gato stomigoso
o a un can rognoso lu ghe fava ponta,
e invece gnanca a mama sua defonta
no'l gavaria concesso, stimo, puf.

Bon, no fa gnente. Xe che in osteria
'veva una cheba, lu, impicada al muro
con tre useleti drento, e a muso duro
chi protestava li mandava raus.

"Ma protestar perchè?" dirè voialtri
"Chi che xe là, che bevi el caliceto,
cossa ghe intriga un povero useleto,
o, meti pur, che ghe ne sia anca tre?"

Intriga, intriga, altro che se intriga,
che, de 'sti usei, do stava boni e stropa,
ma ben el terzo, ciò, iera una sopa
che no'l molava mai, lu, de cantar.

Tre canarini iera, cussì Gnanfo
ne 'veva dito, do cola crestina,
mas'ci 'sti qua, e la terza, canarina,
senza la cresta, calva come, ciò!

E iera propio quela, la spelada,
a tarocarne a tuti sui maroni,
dandoghe zo cussì a pieni polmoni
che un Pavaroti saria stado drek.

De qua se vedi come che noi mas'ci
docili semo, e ziti per natura,
'ndove la baba invece fa paura
per el casin che la xe bona far.

E quela sera là, insoma, 'sto strauss
la ne pareva squasi indimognada,
e 'lora mi una straza go guantada
e su la cheba ghe la go butà.

E scuro. E zita. E noi, tuti contenti
de 'ver trovado, ciò, el rimedio giusto,
ghe 'vemo dado 'ncora più de gusto
a ciamar litri e dopi de merlot.

Solo che po, impiombai, 'vemo tacado
a cantar forte, sa, gente de fraia
semo, e vignù xe Gnanfo, e una tovaia
sora la testa anca a noialtri lu

ne ga butà al impronto. E ziti. E scuro.
E anca stremidi, curaz, e po, intanto
che se zercava vignir fora, un canto
trionfante, come, 'vemo noi sentì.

E co zucando, tira para e mola,
semo 'rivai cavarse via la straza
ne ga tocà de vèder 'sta uselaza
che ne petava el sesto del ombrel!

Mi, Ciano Stifel, Pepi e Gigi Piria
ierimo là, in spaceto, l'altra sera
e se parlava, noi, de come in guera
forsi che iera carestia de vin.

Almeno, questo sostigniva Ciano,
ma mi no iero chissa che dacordo:
"Sgnesula iero, e 'ssai no me ricordo,
ma me contava sempre mio papà

de gaver fat meza guera in Colio,
no disertor, no, solo rifugiado,
e l'altra meza a casa incanfarado
fina che al Duce no i lo ga copà!"

"Insoma dir, eroe?" fa Gigi Piria.
"Eroe?" mi "Eroe, de dir, forsi xe tropo,
anca perchè pitosto che col s'ciopo
lu traficava meio col merlot..."

E qua, a 'sto punto, salta suso un vecio
che ne se iera messo propio arente:
"Eroi, eroi... eroi no vol dir gnente,
eroi xe altro... chi ga combatù!"

Cuchemo, noi, 'sto vecio barca stramba,
che par de quei, savè, "spetime un poco",
e Gigi Piria un fià lo ciol pel fioco:
"Sì combatù... ma chi ga combatù?"

"Chi combatù?" se ingala come un dindio
'l omo, e el se verzi la camisa in peto
"Chi combatù? Vedè qua, con rispeto,
'sto buso? Anzio, colpo de fusil!"

"Orpo!" noialtri, ma partido in quarta
ormai xe 'l vecio, come un de Basalia:
"E questo qua xe un colpo de mitralia,
qua, sula panza, guadagnà a Dunchèrc!"

Po'l se dispoia un brazo e el ne fa veder
sora del comio un longo taio rosso:
"'Sto qua a Peràrbur, squasi fin al osso,
con una bomba i me lo ga squarzà!"

"Bravo!" noialtri, e lu "Bravo una sega!
Volè veder la schena, gente mia?"
e el ne la mostra "Sbarco in Normandia,
mina antiomo e chi ga 'vù ga 'vù!"

Po'l ne fa: "Qua! Batè, batè la gamba...
gamba de legno, garantida in fagio!
Berlino, bunker! Ciò, ghe vol coragio
a nominar eroi 'vanti de mi..."

Lo vardo, mi, e go za le bale piene
de 'sto insempià de vecio che strambisa,
cussì me tiro fora la camisa,
calo le braghe e ghe presento el cul:

"Te vedi questa? Questa xe l'impronta
no de una bomba, solo che de un pie,
ma no un qualunque, un pie quarantasie:
Gnanfo, osteria, batalia per el puf!"

Mi e Gigi Piria tuto se pol dirne
ma no che semo mati senza testa,
perchè co'l mar se ingrossa e xe tempesta
come noialtri pochi sa nudar.

"Per ogni mal pulito xe rimedio!"
'sto qua xe sempre stado el nostro moto
e co gavemo sede ocio de soto:
una ne femo e ne pensemo tre.

El mese indrio, presempio, che ve conto,
ierimo in cista e cole gole arse,
cussì gavemo noi dovù inventarse
un strolighezo per scavar petess.

Bon, se gavemo dunque conzertado,
po semo 'ndadi pei locai atorno,
no inflazionando, solo che un al giorno,
e al sabo sera, se capissi, do.

'Ndavimo drento franchi per 'sti spaci
a consumar no più che aqua de spina,
po se tacava a farghe una manfrina
de no poderse gnanca conzepir.

A un zerto punto Gigi sbianchizava
e 'l ghe mostrava a tuti la ganassa:
"Ara che diol, 'sto dente no me lassa
de zinque giorni viver nè morir!"

"Povero!" tuti, e qualchidun ghe ofriva
de cior un Aspro, ma: "No me fa gnente!"
lu ricusava, e mi, a tambur batente,
subito pronto: "Qua xe de cavar!"

Po: "Feme largo, gente, che mi 'desso
a 'sto macaco in mezo al'osteria
ghe cavo el dente, senza anestesia
e senza farghe gnanca un fià de mal!"

Po ghe ligavo un spago al dente finto
e ghe petavo forte una zucada,
e Gigi, lu, con aria rinfrancada,
mostrava el buso come un tululù.

Tuti stupìdi, ciò, pel suo coragio,
e tuti quanti a dirme "Bravo, bravo!",
po, se capissi, a colpi de un otavo
'ndavimo in bala senza mai pagar.

'Sta ssiena qua petada la gavemo
in trentadò locai, no mai cambiando,
solo che Gigi po, un cicìn sbavando,
un bulo giorno el me ga dito: "Ciò,

mi no me lagno fin che xe de bever,
però te averto, sa, che ieri sera
go, come dir, finida la dentiera
e no go in boca più cossa cavar!"

"No bazilar" mi franco "che dimani
faremo 'ncora, e sa che no te flocio:
volarà dir che mi te cavo un ocio,
sempre col spago, e po se vedarà!"

Credeme a mi, xe un stress no indiferente
'sta roba qua, che co me calo in branda
no spavo ben, mi, come Dio comanda,
ma a mezanave come un fulminà.

Sempre per via che fazo sogni sclebez
che fina Froid, mi credo, li scartassi
se mi, podendo, a lu ghe li contassi
giusto cussì per farlo stroligar.

L'unica roba che xe sempre uguale
inte i mii sogni, come dir?, xe el sfondo,
sempre un local, e, questo no ve scondo,
xe el solo fato che me va a fasul.

Stanote scorsa iero mi, presempio,
int'un spaceto 'pena fora el bloco
e iero duro squasi come un zoco,
bon che i sloveni i lasca un fià sul puf!

Son là, disevo, che ghe dago forte
de cvalalepa e dobro e malvasia,
co vien de colpo drento in 'st'osteria
un calandron vestido come un strauss.

El ga el capel de càuboi sula glava
e sul sacheto el ga impuntà una stela,
po'l ga pistole e in schena el ga una sela
che un domandassi: andove xe el caval?

Prima el se cuca 'torno suspetoso,
po'l se caluma fina 'rente al banco
e "Iedno pivo!" lu'l domanda franco
caracolando intanto per zacai.

"Ciò, xe Gion Vaine, no ghe piovi sora!"
penso, e me alzo, e po ghe vado 'rente,
e lu'l me fa una facia soferente
e squasi el pianzi drento inte 'l bicer.

"Viva là, Gion!" ghe fazo "Cossa nassi?
forsi te ga, su, dime, qualche rogna?"
"No" lu'l me fa "xe solo la vergogna
che go, iebenti, e me scaveza el cuor!"

"Come vergogna? Cossa te straparli?
Se per noialtri, qua, te son un mito!"
"'Posta" 'l me fa "che invece mi pulito
nela realtà no so 'ndar a caval!"

"E Ombre Rosse? E Liberti Valance?
Se del caval perfina te sparavi..."
"Eh, Toio mio, se meio te vardavi
quel iera un altro, miga iero mi!

Perchè fazevo mi, sì, sbrataverum
come sierifo, o eroe senza paura,
ma me serviva la controfigura
co gavaria dovudo cavalcar!"

"Su cola vita, Gion!" ghe slongo un quarto
"No xe vergogna: mi, co stago in dieta,
controfigura mando in taverneta
a bever voda al posto mio de mi!"

Mi no conosso pezo roba al mondo
de 'l omo cul che no ghe ciava gnente,
uno che tuto ghe xe indiferente,
insoma, uno che no ga ambizion.

Cioleme mi, presempio, che son cisto
e che nissun no stima calcolarme,
cossa so far mi? Solo che imbriagarme,
perchè capisso solo che de vin.

Però 'nca mi, cul su cul zo, son omo
che ga una propia dignità, e 'sto fato,
che sora al vin a mi nissun el trato
xe bon ciaparme, me ga da' morbin.

Tanto xe vero che me go impensado,
za che son ciò, paron dela materia,
de zimentarme int'una roba seria
e dar 'l esame, mi, de someliè,

cussì, per viz e per schiciar le bobe.
Me informo ben, po ciogo apuntamento
e co xe 'l giorno e l'ora me presento
pulito, 'vanti de 'sta comission.

Zinque de lori xe, drio de una tola,
e sula tola xe boze e biceri
fina pel porco, e come camarieri
morca i travasa, un dedo per bicer.

Po i me dà un de 'sti biceri e cossa
che ghe xe drento i vol saver e, franco,
ghe fazo mi: "'Sto qua xe un pinot bianco
del novantuno, e el ve xe ben che 'ndà!"

"Bon, e 'sto altro?" i fa, dandome un altro.
"Che sento!" mi "'Sto qua xe un bon recioto
imbutilià, per mi, nel novantoto,
fine setembre, verso el vintitrè."

"Orpo!" 'sti mati i resta un fià de mone,
e po i me slonga, come, drugo assagio.
"Barolo!" mi "Novantaquatro, magio,
imbutilià la sera del vintiùn!"

Cagadi i xe. "E 'sto qua?" i me fa "Vedemo
s'el sa 'sto qua!" "'Sto qua xe un malvasia
de do ani fa, che un istrian caìa
ga batizà fazendo fora drek!"

"'St'omo sa tuto!"sento che i se disi,
e un de 'sti qua, per farme un scherzo come,
me dà un bicer de nero e "Daghe un nome"
el me remena po "se te son bon!"

Iera un mismas, ma go savudo dopo,
'ssai dopo, mi, de inchiostro e de benzina,
e go bevù de un fià e "Porca matina"
go pensà "e cossa, me se vol guar?"

E 'lora forte go zigà trionfante:
"Ciò, vostra mare che ghe vegni el granfo,
'sto qua xe bon, 'sto qua el merlot de Gnanfo
xe, che ogni sera el spila in suo local!"

Zinque o sie giorni no vedevo in spacio,
mi, Gigi Piria e iero preocupado
perchè xe un omo che, anca se malado,
no'l se dà mai malado sul lavor.

Po finalmente al setimo lo intivo
de sera tardi in osteria a San Saba,
incanfarado pezo che un baraba
e con do quarti pieni uno per man.

"Beati i oci!" fazo e po me calo
'rente de lu "Pensavo che te ieri
coi pie in avanti, o almeno soto i feri,
che a no vedèrte, sa, stavo in pensier!"

Me cuca lu, po: "Corni che te impiri!"
el fa, fazendo el moto de tocarse
"Però go 'vudo un spago de cagarse
che 'ncora tremo, vara, questo sì!"

"Spago? Che spago?" "Tasi tasi mona!
Bon, no te vol che l'altra setimana,
apena alzà, in balìa dela nagana,
te spudo sangue drento el lavandin?"

"Vaca mastela! Sangue?" "Sangue, propio!
E a mi, che fumo spagnoleti bomba,
me xe passada al volo anca la piomba
e, alo alo, presto del dotor!"

"Un bravo?" mi, e lu: "Cossa bravo e bravo?
Quel dela mutua, po, ma che pulito
me ga mandà del spezialista drito,
che cola plucia no se pol scherzar!"

"E te son 'ndado?" "Logico po, urgente
gavevo scrito sora del papiro,
e 'sto qua infati, un professor, un sbiro,
come una calza, ciò, el me ga voltà!

Po'l me ga fato far dozento esami,
e lastre, po, che gnanca no se parla,
e in più scopìa, che co son 'ndado a farla
un me ga fato e i me tigniva in tre!"

"E po?" "E po gnente, tuto regolare,
ga dito el mato, robe de no creder,
e che ghe porto là 'sto sangue a veder
che lu lo manda a far analizar."

"Ma te spudavi 'ncora?" "Ogni matina,
e go spudà, difati, int'un vaseto
che ghe go dà, e po gnente, e po che speto
i risultati quando che sarà..."

"Te ga savù qualcossa po?" "Sicuro"
fa Gigi Piria tuto vergognoso
"me ga ciamà 'sto professor, nervoso
che fina drek, me par, el ga zigà.

Se so, el me fa, cossa che xe el riflusso,
e che se vado 'ncora ulmo in branda
che no ghe rompo a lu, che lu no manda
un'altra volta a analizar merlot!"

Drek de colombo, i disi, porta bori:
mi digo invece che 'sti maledeti
xe boni solo a smasalar sacheti,
e drek, che sapio, porta solo drek.

Iero difati in piaza dele Poste
che 'ndavo in Posta a far un telegrama,
quando un colombo fio de bona mama
me ga zentrado in pien sora el capel.

Pecà che mai in tuta la mia vita
mi go portà el capel, e co un colombo
che par un manzo ve fa in testa un piombo
ghe vol, credeme, solo Amoniacàl.

Neti i cavei 'vevo in local de sera,
giusto un cicìn più come scoloridi,
ma tuti quanti xe restai stupìdi
che no parevo squasi gnanca mi.

Fin Gigi Piria, che no xe cativo,
el se ingalava, ciò, a ciorme pel fioco
e me brusava, mi, 'sto qua no poco
che son 'bituado mi a ciorlo pel cul.

Fatostassì che, un quarto dopo 'l altro,
mi me montava el futer contro el mondo
e gavaria voludo, no ve 'scondo,
'ver tra le man quel satrapo de usel.

A un zerto punto, in piomba tipo Zoro,
go ciapà Gigi e ghe go dito: "'Speta,
'desso te fazo veder che vendeta
sutil che mi me go impensà de far!"

Son 'ndà rolando drento la cusina
e go intimado al cogo: "Qua per Toio
faghe un paston, che sia risi col oio
e che no sia de meno de un quintal!"

Po co'sto saco sora dela schena
e Gigi Piria a papuzarme drio,
son tornà in piaza dele Poste e "pio
pio" ghe go fato e i xe vignui becar.

I sarà stai, mi digo, più de mile
'sti malegnasi usei che ga zenado:
"I saverà cussì" go calcolado
"la stiticheza cossa che vol dir!"

Pecà de Dio che no me go inacorto
però che un tubo iera là pulito,
e che tic tac el me ga ben che scrito
bula denunzia e chi ga 'vù ga 'vù.

Mi sule prime no me go scomposto,
e gnanca po co xe 'rivado el messo
co l'ingiunzion de 'ndar soto prozesso,
parte zivile l'Enpa, in tribunal.

"Bon" go pensà "se i me darà la multa
per quatro usei no subirò un dissesto!"
Va ti pensar che gaverio dovesto
uno per uno farghe el clisterin!

Cossa volè, co se xe un fià bevudi
qualche parola scampa grossolana
e, co me trovo in piomba popolana,
de mi xe squasi tuto un porconar.

Bon, no volè che un giorno come un altro
che strambizavo in mezo a l'osteria
trovo un esperto de glotologia
che sta 'scoltarme zito int'un canton?

Co go finido de sgranar rosari
el me vien 'rente e po 'l me fa: "Scometo
che lei nacque in Cavana, e mi permeto
di precisare melio, in via Fortin."

Po'l se rivolzi ai altri, mezi duri,
e 'l ghe disi:"Vedete 'sto rotame?
'Sto rifiuto? 'Sto gran morto de fame?
'St'ultima riota del'umanità?"

Po'l continua:"Se solo per un mese
me lo 'fidate, a questo io ci insegno
a parlar bene, e qua ci prendo impegno,
che tuto il mondo dovarà amirar!"

"Ma come ben?" domando un fià stranido.
"Cussì ben che tra un mese, e se ci ha furia
anca prima, ala festa dela Curia
senza patema la ci porterò!"

"Toio Bertoldo a bagolar in Curia?
E po magari in primo banco a messa?"
Nissun credeva e, solo con scomessa,
che bon, che provo, po i me ga impatà.

Cussì son 'ndado casa de 'sto strambo
e go afrontado un mese de suplizi,
far ssiolilingua e po far esercizi
de parlar con in boca el sassolin.

Ala fin po del mese, ben pulito,
semo 'ndadi mi e lu drento el spaceto
e go ciamado un bulo caliceto
però ciamando in punta de piron.

Passà 'l esame, xe vignudo el giorno
che là in Curia i ga dado una gran festa,
e mi e 'sto mato, cola banda in testa,
in pompamagna semo 'ndadi, ciò!

Noma che ben la prima meza ora,
che ghe disevo a tuti "monsignore"
e "permete?" e "Deograzia" e "per favore",
che iera fin el vescovo incantà.

Però la sede po ga ciapà el trato
e là go 'vù propio un'idea de chebe:
"Chi di lor siori mi favorirebe,
a Dio piacendo, un gocio di merlot?"

"Filiolo, no!" me ga risposto lori
"Con Baco certo qui no ci si intende!"
E xe stà là che un triplo "Bale orende!"
al glotologo e a mi ne ga guà!

"La note picia xe per noi"cantavo
mi quela sera "tropo picinina,
e dadaumpa fin diman matina
faremo noi, e viva là e po bon!"

Difati, 'vendo de serar el spacio,
i ne gaveva a piade butà fora,
solo che 'ssendo 'ncora un fià bonora
noi ne spuzava in busta de 'ndar za.

Come chi noi? Chi po? Ma Gigi Piria
in piomba tipo Pater Ave e Gloria
e dedrio in piomba, mi, acompagnatoria
a dar la rota de navigazion.

Destinazion? Ma no, gnente de tale,
'ndavimo 'torno indove capitava,
giusto cussì, no?, per snebiar la glava
e riciapar de novo un fià color.

Iera 'bastanza dopo mezanote,
anzi la una, stimo, za passada,
e nissun iera in giro per la strada
a parte qualche pantigana doc.

A un zerto punto, come se trovemo
a velegiar in zona de Bariera,
noi ne se para una figura nera
davanti, in scuro, pezo che el babau.

Nero el mantel, nera la scufia in testa,
mi in sule prime ciapo un fià paura,
po me inacorzo, ciò, che 'sta figura
xe una suorina del Divin Gesù.

Gigi se bloca, po la varda in taio,
e anca la suora subito se bloca,
e no la 'riva gnanca a verzer boca
per el pipiu che, calcolo, la ga.

Alora Gigi, 'vanti che lo guanto,
petando un zigo el se ghe buta 'dosso
e là el prinzipia a darghe a più no posso
che ghe mancava solo el ratapalz.

Prima un papin sula ganassa destra,
po un su l'altra, po un dedo int'un ocio,
e po un viliaco tiro col zenocio
che gavaria castrà un gato castrà.

Come 'sta suora, povera, se cucia
tuta in avanti pel dolor potente,
con un canoto Gigi, come gnente,
me la distira longa sul pavè.

"Orpo" ghe fazo "Gigi, mi capisso
de biastemar, ma fin de darghe un fraco
a una suorina mi me par un smaco
che gnanca el papa tolerar no pol."

Ma Gigi Piria gnanca no me 'scolta,
el varda in tera e po'l spudacia: "Giuro
che te pensavo, Batman, 'ssai più duro!"
e po'l va via cantando per zacai.

Mi ghe go sempre dito a tuti quanti:
"Come prinzipio in ligna generale
se moro mi, tochemosse le bale,
no voio veder fiori sul furgon.

Guai darghe bori ai satrapi fioristi,
che la gente va in tomba e lori incassa,
e 'ste girlande po i mati le amassa,
'sti afossadori, come fussi drek!

Pitosto a mi, volendo propio spender,
porteme vin, refosco, malvasia,
che son persuaso che me pararia
squasi de esser meno morto un fià!"

Cussì mi sempre tontonavo in giro
e xe stà quel che me ga dà l'idea
co mi me go trovà in bassa marea,
batù de sede e cisto rovinà.

Steme sentir coss'che go combinado:
go scominzià una sera in taverneta
a butar strambo sora una polpeta
e a far de moto che no stavo ben.

Po son 'ndà casa, logico, zotando,
che me fazevo squasi pecà solo
e, no savendo che ghe iera el dolo,
"Auguri Toio!" tuti ga zigà.

Per oto giorni mi me go tapado
pulito in casa, i scuri ben seradi,
fina che un per de lori, impressionadi,
me xe vignudi, poveri, a trovar.

"Come xe Toio?" e mi, più meo de Gassman,
ghe go imbastido una grandiosa ssiena:
tuto in sudori, respirando 'pena,
coi oci foschi e col tremaz de man.

I xe 'ndai via scassando un fià la glava
e 'lora mi, la setimana dopo,
ghe go mandado a tuti a dir col gropo:
"Toio xe morto, e chi ga 'vù ga 'vù."

Camera ardente: mi distirà in leto,
con el rosario in man che me picava,
do zieri in fianco, che senò stonava,
e che gavessi pianto fina mi.

In fila indiana tuti i petessoni
i xe vignui col fiasco a saludarme,
e i se cuciava tuti per basarme
e, tuti, el fiasco i lo lassava là.

Xe vignù Gigi col tocai del Colio,
Bobo Tre Panze con un marzemino,
e Ciano, e Pepi con un bardolino
e Genio, ciò, con fina un picolit.

De note, po, mi go ressussitado
per darghe fondo a tuta la cantina:
tignive duri, solo aqua de spina
drento dei fiaschi, ludri fioi de can!

"Te vedi Gigi come xe la vita"
int'un spaceto ierimo una sera
imbibitadi in piomba salotiera
mi e Gigi Piria col bicer in man

"nissun a mi no me daria do lire,
tuti disessi: ciò, varda quel lole,
xe un imbriagon che no ga fato scole
e no xe mai andado oltra Roian!"

"Sì sì, xe vero" me conferma Gigi
"'nca mi diria, per via che te conosso:
ciò, te son sempre, ti, in profondo rosso,
'ndove te ciol i bori per viagiar?"

"E qua te meti a nudo l'inioranza"
ghe fazo mi "xe stadi viagiatori
che ga girado el mondo senza bori,
basta saverse solo un fià missiar!"

"Urca mastela," Gigi se impressiona
"ti te vol dir..." "Mi solo che una roba
te voio dir, che Toio no xe boba
e ga viagià per tuto, altro che no!"

Qua Gigi Piria cala in stiva un quarto:
"E te son stado..." "Mi son sta' pulito
per tuti i loghi, fin son sta' in Egito,
che ti mai più te gaveria pensà."

"'Lora, ostroporco, te ga visto el Gange..."
"Ma cossa Gange, dei, che quel xe in India,
lori ga el Nilo, no, tu' mare dindia!,
cossa, 'sta roba gnanca no te sa?"

"Ma quando?" "Cossa quando come e dove,
go cognissù una volta in osteria
un mato spanto per l'archiologia:
ghe go dà corda e chi ga 'vù ga 'vù!"

"E po?" "E po gnente, co 'l xe 'ndà in Egito
a scavar tombe, lu, de pala e pico,
mi - piato rico a maca mi ci fico -
me go intortado e son 'ndà drio de lu.

Pensa che là el me ga menado a Lucsor,
'ndove una volta tuti i faraoni,
che ghe piaseva far i grandezoni,
i 'veva tomba, ma ognidun per sè."

"Che bulo!" "Sì, ma iera anca i cativi,
che i malediva tuti come gnente,
presempio guai, no so, de 'ndarghe arente
là dela tomba de Tutancamòn."

"Guai?" "Guai! Difati, mi son stà ben 'tento,
co la go vista, de tirar avanti,
e son 'ndà drento, invece, senza guanti,
int'un tombin che iera là tacà."

"No maledeto?" "Tasi, orca tu' pele!
Iera la tomba de Tutancamona,
la molie, ciò, che - Sempre sarà mona -
la malediva - chi passa per qua! -"

Babe? No grazie, babe le fa dano
de 'pena nate fina che le mori:
Toio Bertoldo babe no ghe ocori,
ghe basta e 'vanza un bon bicer de vin.

Però una volta, Dio, co iero mulo,
picavo un fià anca mi de quela parte
e, za che indrio no iero cole carte,
più de una baba 'torno go ingrumà.

Inamorà? No esisti! Be, per quanto,
spacando in do el cavel cola manera,
me ga girado, sì, la capuzera
per una mula, ma 'ssai tempo fa.

Bela mulona iera, me ricordo,
alta de cul, con tete stile Impero,
e, se volemo dir propio per vero,
iero, quel giro, spanto incocalì.

Solo che... baba po! No zonto altro!
Ela sofriva, come, de manie,
no la podeva veder le osterie
nè i petessoni, nè - Dio vardi - el puf.

Cussì gavevo mi, voio no voio,
de far la solfa del camaleonte:
solo che aqua beverghe de fronte
salvo che drio po darghe de petess.

Iera una crose de portar in schena,
però 'l amor, sto qua savè anca voi,
no xe sicuro brodo de fasioi
e in quela volta iero tululù.

Po per de sora la gaveva quela
che ghe piaseva andar ai bali 'torno,
e ben che 'ndada la saria ogni giorno
se gavaria savudo, mi, balar.

Scola de valzer la me ga intimado,
po de mazurca, po de fox e mambo:
ela credeva, calcolo, che Rambo
stando con ela fussi diventà.

Mi per amor fazevo, no ve 'scondo,
e tanghi, e sambe, e tuto quel che iera,
ma xe cascado el mus co quela sera
la ga priteso de impararme el roc.

Gnente de mal, dirè, lo bala in tanti
senza far cine! Sì, pecà che solo
la ga volù balarlo in zima al molo
e mi, balando, son 'ndà a pico in mar.

Cussì le bale gira po dei bali
e, tornà su, go dito: "Ben, sa cossa?
'Desso te imparo mi una bela mossa!"
e int'un spaceto me la go rucà.

Là go ciapà una piomba ala Don Lurio,
po "No xe un balo" mi ghe go spiegado
"ma xe una bula bala!" e, distirado,
ghe go petado el sesto del ombrel!